“Мен және табиғат” әлеуметтік сауалнама” зертханалық жұмысы арқылы 5 және 6 сынып оқушыларын экологиялық мәдениетке оқытудың педагогикалық технологиялары

Аннотация

Жалпы білім беретін мектеп оқушыларына оқытылатын жаратылыстану оқулықтарында әртүрлі тәжірбелік, зертхана жұмыстарына арналған сабақтар және эксперимент жұмыстары қарастырылған. Оқулықта берілген тапсырмаларды педагогикалық әдіс-тәсілдерді қолданып, оқушылардың жаратылыстану пәніне қызығушылығын оятуға болады. Бұл жұмыста 6-шы сыныптың оқушыларына экологиялық мәдениетке оқытудың педагогикалық әдісі туралы жазылған, сондай-ақ зертханалық жұмысты әлеуметтану сауалнамарын қолдану қарастырылған. Зерттеу жұмысы білім алушылардың экологиялық білімін және олардың экологиялық мінез-құлқын дамытуға арналған. Жұмыста жалпы экологиялық мәдениеттің теориясы, зертханалық сабақтар мен сауалнамалар, сонымен қатар тәжірибелік іске асуы туралы баяндалған. Эксперименттік сыныптар ретінде Алматы қаласы Бостандық ауданының №81 мектеп гимназия 5-ші және 6-шы сынып оқушылары қатысты. Тәжірибе жұмысының бірінші бөлімінде оқушылар 3 топқа бөлінді: 1-ші топ - сауалнама толтырумен айналысты; 2-ші топ - сауалнамаға жауап берді; ал 3-ші топ - жауаптарды талдап, қорытындысын шығарды. Екінші бөлімінде оқушылар №81 мектеп-гимназияның маңайында тұратын тұрғындардан, дәлірек айтқанда «Көктем ықшамауданы» тұрғындарынан, сауалнама алды. Зерттеудің 3-ші бөлімінде  оқушылар мұғалімнің көмегімен сауалнама жауаптарын өңдеп, талдап, модельдер тұрғызды. Сабақтан кейін кері байланыс алынды. Зерттеуге қатысушы білім алушылар 100%-ы «өте жақсы» деген кері байланыс барген. Зерттеудің нәтижелері зертханалық сабақтар мен сауалнамаларды талдау жұмыстары арқылы, оқушылардың экологиялық мәдениетті қалыптастырудың тиімді әдіс-тәсілдердің бірі екенін көрсетті. Сонымен қатар, бұл әдістер оқушыларды сабаққа белсен қатысып, теориялық тұжырымдарын өмірде қолданып, функционалдық ойлауларына көмектеседі. Мақала бұдан кейінгі зерттеулерге ұсыныстармен аяқталады.

Түйін сөздер: сауалнама, жаратылыстану пәні, экологиялық мәдениет, адам және табиғат, зертханалық сабақ, талдау, модель құру, педагогикалық әдістер.